Osiyo chempionlar ligasi nimchorak final bosqichidan o‘rin olgan «Nasaf» -«Al-Ayn» uchrashuvidan oldin bo‘lib o‘tgan matbuot anjumanida darvozabon Abduvohid Ne’matov ham ishtirok etib, o‘z fikrlari bilan o‘rtoqlashdi.
— Ertaga qiziqarli va yaxshi o‘yin bo‘lishiga umid qilyapmiz. Ertangi bahsga tayyormiz. O‘z uyimizda bo‘ladigan o‘yinga g‘alaba uchun maydonga tushamiz.
"Al-Ayn"ning kuchli va kuchsiz jihatlarini murabbiylar bizga tushuntirib berishdi. Raqib jamoa safida standartlardan foydalanadigan futbolchilarni o‘rgandim, degan umiddaman. Xudo xohlasa, diqqatliroq bo‘lib harakat qilaman.
— Abduvohid, jamoamiz hujum qilayotganida siz jarima maydonini tark etib, ko‘pincha maydon markaziga yaqinroq joyga kelib qolasiz. Shunday paytda raqib to‘pni ustingizdan oshirib gol urishi mumkinligi haqida xavotir bo‘lmaydimi? Yoki bu murabbiy ko‘rsatmasimi?
— Bundan qo‘rqqanimda darvozada turmasdim. Boshqa tomondan raqib futbolchilaridan kelib chiqib murabbiylarning ko‘rsatmasi ham bo‘ladi.
