Ispaniya chempionatining 25-turi doirasida «Barselona» safarda «Selta» klubi mehmoni bo‘lib, juda qiyin g‘alabani qo‘lga kiritdi.

Uchrashuvda xavfli vaziyatlar ko‘p bo‘lmadi. To‘p asosan maydon markazida bo‘ldi. Kataloniyaliklar birinchi bo‘lim so‘ngida hisobni ochishga muvaffaq bo‘lishdi. Lamin Yamalning uzatmasidan keyin Levandovski 12 metrlardan zarba berib, to‘pni darvozaga joyladi.

Vigoliklar ikkinchi bo‘lim boshida muvozanatni tiklashdi. Mingesa tomonidan berilgan pasdan keyin Aspas 17 metrlardan zarba yo‘lladi. To‘p himoyachining oyog‘iga tegib o‘z yo‘nalishini o‘zgartirdi va to‘rga borib tushdi.

"Barselona" ikkinchi bo‘limga qo‘shib berilgan daqiqalarda g‘alabani ilib ketdi. Mezbon himoyachisi o‘z jarima maydoni ichida bexosdan Yamalni tepib yiqitib qo‘ydi. Penalti. Levandovski tomonidan penaltidan yo‘llangan zarbani "Selta" posboni qaytardi. Ammo zarba berilayotgan paytda u chiziqni tark etgani uchun 11 metrli zarba qaytadan ijro etildi. Bu safar Robert vaziyatni golga aylantirdi.

"Barselona" ushbu g‘alaba tufayli o‘z ochkolarini 54 taga yetkazib, 3-o‘rinni egallab turibdi. "Selta" esa 20 ochko bilan 17-o‘riinga joylashgan.

Ispaniya La ligasi, 25-tur
Selta – Barselona 1:2 (0:1, 1:1)
Gollar: 0:1 – 45 Levandovski, 1:1 – 47 Aspas, 1:2 – 90, penalti Levandovski.
Selta – Guaita, Mingesa (Vaskes, 85), Starfelt, Dominges (Nunyes, 46), Ristich (Sanches, 59), De La Torre, Tapiya, Beltran, Alyende (Svedberg, 77), Aspas, Larsen (Duvikas, 85).
Barselona – ter Stegen, Kunde, Arauxo (Martines, 46), Kubarsi, Joau Kanselu, Kristensen (Gyundogan, 58), de Yong, Pedri (Lopes, 75), Yamal (Romeu, 90), Levandovski, Roke (Rafinya, 58).
Ogohlantirishlar: Alyende (15), Kristensen (38), de Yong (90), ter Stegen (90), Martines (90).