Bugun «Andijon» yangi mavsum uchun tayyorgarlik jarayonidagi oxirgi o‘rtoqlik uchrashuvida ishtirok etdi. Oldin xabar berganimizdek, sparring-raqib «Dinamo» klubi bo‘ldi.

O‘yin oldidan yomg‘ir yog‘ishni boshladi va futbolchilar uchrashuvni aynan yomg‘ir ostida o‘tkazdilar. Lekin bu holat jamoalarga u qadar halaqit qilgani yo‘q. Darvoqe, uchrashuv «Odil Junior» nomidagi futbol akademiyasi sun’iy maydonida bo‘lib o‘tdi.

O‘yin juda qiziqarli hamda keskin hujumlarga boy o‘tdi. «Andijon» futbolchilari bahs boshidanoq tashabbusni o‘z qo‘liga olib, raqib darvozasi oldida birin-ketin xavfli hujumlarni uyushtira boshladi. Futbolchilar o‘yindan-o‘yinga ancha shakllanib borayotgani bugungi bellashuvda yaqqol ko‘rindi va albatta ijobiy holat.

Uchrashuv davomida nadijonliklarda gol urish uchun juda qulay imkoniyatlar bo‘ldi. Luka Zgurskiy, Sherzod Esanov, Farhod Sohibjonov va yana boshqa o‘yinchilarning zarbalari juda xavfli chiqdi. Gohida darvozabon mahorat ko‘rsatdi, yana ba’zida darvoza ustuni ularni goldan saqlab qoldi. Ayrim holatlarda esa to‘p darvozaning shundoq yonginasida o‘tib ketaverdi.

Ha, raqib jamoada ham ayrim holatlarda imkoniyatlar ko‘zga tashlandi. Ammo himoyachilarimiz va darvozabonimiz o‘z vaqtida reaksiya ko‘rsata oldilar. O‘yin 0:0 hisobida yakunlandi. Yomg‘ir yog‘ib turganiga qaramasdan futbolchilar maydonda tinim bilmadilar. Bu xuddi Superliganing rasmiy maqomdagi o‘yini kabi kechdi, desak mubolag‘a qilmagan bo‘lamiz.

Qolaversa, uchrashuvni tomosha qilish uchun bir qancha mutaxassislar ham kelishdi. Chunki bahs o‘rtoqlik maqomida bo‘lsada, qiziqish anchagina edi. Shuningdek, maydon egasi, O‘FA birinchi vise-prezidenti Odil Ahmedov ham o‘yinni bevosita stadionda kuzatib bordi.

«Andijon» matbuot xizmati.