Britaniyalik bokschi Tayson Fyurining otasi Oleksandr Usik jamoasi a’zosiga bosh bilan zarba berdi.

Ukrainalik bokschi jamoasi a’zolaridan biri Taysonning otasini urishga uringach, Jon Fyuri unga boshi bilan zarba berdi. Natijada Jonning boshi yorildi.

Eslatib o‘tamiz, Super og‘ir vazn toifasida WBC chempioni Tayson Fyuri18 may kuni Ar-Riyod shahrida tashkil etiladigan boks oqshomida WBA, IBF va WBO yo‘nalishlari chempioni, ukrainalik Oleksandr Usikka qarshi mutlaq jahon chempionligi uchun ringga ko‘tariladi.

Ma’lumot uchun, 35 yoshli Tayson Fyuri o‘zining so‘nggi jangini o‘tgan yilning oktyabr oyida kamerunlik MMA jangchisi, sobiq UFC chempioni Frensis Ngannuga qarshi o‘tkazib, hakamlarning qarori bilan g‘alaba qozongan edi. Tayson professional boksda 34 ta jang o‘tkazib, barchasida g‘alaba qozongan (24 tasi nokaut bilan). Hisobida bitta durang bor.

Ukrainalik Oleksandr Usik esa o‘tgan yilning avgustida britaniyalik Daniel Dyubuani 9-raundda texnik nokautga uchratib, o‘z kamarini majburiy da’vogardan himoya qilgandi. U ham barcha 21 ta jangida g‘alaba qozongan (14 tasi muddatidan oldin).