Angliya terma jamoasi sardori Xarri Keyn jamoa Yevropa chempionati pley-off bosqichiga C guruhida birinchi o‘rin bilan chiqqani haqida gapirdi.
25 iyun kuni inglizlar uchinchi turda Sloveniya bilan durang o‘ynadi (0:0) va turnirdagi uchta uchrashuvda 5 ochko to‘pladi.
"O‘ylaymanki, biz birinchi o‘rinni egallaganimiz bilan faxrlanishimiz mumkin. Bu yirik musobaqalarda oson emas. Ko‘rganingizdek, ba’zi boshqa davlatlar, boshqa yirik millatlar guruh bosqichini birinchi o‘rinda yakunlay olmadi, shuning uchun biz mamnun bo‘lishimiz mumkin," - dedi Keyn.
Shuningdek, u Angliyaning Yevro-2024dagi keyingi istiqbollari haqida fikr bildirdi.
"Bizga kim qarshi tushmasin, bu og‘ir o‘yin bo‘ladi. Hozir bu bosqichda yengil o‘yinlarni ko‘rmaymiz. Shunday ekan, kim bo‘lishidan qat’iy nazar, biz har doim qilgan ishimizni qilamiz - yaxshi tayyorgarlik ko‘ramiz," - deya qo‘shimcha qildi futbolchi.
Garet Sautgeyt jamoasi 1/8 final doirasidagi bahsni 30 iyun kuni o‘tkazadi. Angliya terma jamoasining raqibi keyinroq aniqlanadi.
