Azizjon Kamilov Osiyo chempionatiga jo‘nab ketish arafasida turgan murabbiy va dzyudochilarimiz bilan uchrashdi.

Xabar berganimizdek, 29 avgust - 1 sentyabr kunlari Koreya Respublikasining Mungyong shahrida o‘smirlar va yoshlar o‘rtasida Osiyo chempionati bo‘lib o‘tadi.

Bir necha kundirki, har ikki terma jamoamiz bo‘lajak qit’a birinchiligiga tayyorgarlik ko‘rmoqda.

O‘smirlarimizning mashg‘uloti Toshkentda tashkil etilayotgan bo‘lsa, yoshlarimiz Buxoro shahrida o‘quv-mashg‘ulot yig‘ini o‘tkazib qaytishdi. Har ikkala terma jamoamiz ham to‘liq tarkibda Osiyo chempionatida qatnashadi.

O‘zbekiston Milliy olimpiya qo‘mitasi raisi o‘rinbosari, mamlakat dzyudo federasiyasi raisi Azizjon Kamilov safar oldidan turgan dzyudochilarimiz va ularning murabbiylari bilan uchrashdi.

Suhbat chog‘ida Azizjon Yakubjanovich murabbiylarning tayyorgarlik haqidagi fikrlarini tingladi va o‘z tavsiyalarini berdi.

Ma’lumot uchun, Osiyo chempionatida qit’amizning 17 davlatidan 400 nafarga yaqin dzyudochi medallar yo‘lida tatamiga chiqadi.