UFC 311 turnirining asosiy jangida yengil vazn toifasida amaldagi divizion chempioni Islam Maxachev majburiy da’vogar Arman Sarukyandan kamarini himoya qiladi. Arman uchun revanshga aylanadigan jang oldidan Islam o‘z taxminini bildirdi.
Maxachev jangni hakamlar qaroriga qoldirmoqchi emas, u hamyurtini parterda mag‘lub etishni maqsad qilgan. Bu haqda u Daniel Kormyega bergan intervyusida aytdi.
"Birinchi jangda men uning bekgraundlarini bilmagandim. U mening kurashimdan yaxshigina himoyalangandi. Rostan ham u o‘shanda menga raqobatli jang taqdim etgandi. Og‘ir jang o‘tkazganimni tan olaman. Lekin hozir men u haqda hamma ma’lumotlarni bilaman. O‘ylaymanki, uni muddatidan avval mag‘lubiyatga uchrataman. Charlz Oliveyra Armanni deyarli har bir raundda mag‘lub etgan edi. Charlz Armanni gilyotina, uchburchak usullariga tushirib, jangning o‘zida finish qilishga yaqin kelgandi. Shu ishni men yakunlab qo‘yaman", - dedi Maxachev.
Eslatib o‘tamiz, 2019 yilning aprel oyida o‘tkazilgan ilk jangda Maxachev ochkolar hisobiga ko‘ra g‘alaba qozongandi. O‘shanda Arman Sarukyan o‘zining UFC`dagi debyut jangini o‘tkazgan edi.
