29 yoshli yengil vazn toifasida jang qiladigan tanzaniyalik Hassan Mgaiya nokautdan bir necha kun o‘tib vafot etdi. Bu haqda talkSPORT nashri xabar berdi.

27 dekabr kuni Tanzaniya poytaxtida joylashgan “Duniya Ndogo” sport zalida bo‘lib o‘tgan jangda Mgaiya o‘z hamyurti Pol Elias tomonidan nokautga uchratildi.

“Hassan Tanzaniyaning Sinza shahridagi Falastin shifoxonasiga yetkazildi, keyin esa Mvananyamala shifoxonasiga ko‘chirildi va u yerda so‘nggi daqiqalarini o‘tkazdi. WBC prezidenti Maurisio Sulayman sportchining oilasi va yaqinlariga chuqur hamdardlik bildiradi. Xotirangiz abadiy bo‘lsin”, — deyiladi WBC bayonotida.

Tanzaniyaning The Citizen gazetasida yozilishicha, Mgaiya o‘zining so‘nggi jangida beshinchi raundda boshiga bir necha marta kuchli zarba olgan, buning natijasida yerga qulab, tilini tishlab olgan. Til esa tomog‘iga tiqilib qolgan.

Mgaiya professional faoliyati davomida 9 ta jang o‘tkazgan. So‘nggi jang uning faoliyatidagi ikkinchi nokaut bilan tugagan mag‘lubiyati bo‘ldi.