Karlo Anchelotti "Osasuna"ga qarshi o‘yinda hakamlikdan norozi bo‘ldi.
La Liganing 24-turidan o‘rin olgan “Real” va “Osasuna” jamoalari o‘rtasidagi o‘yin 1:1 hisobida yakunlandi. Uchrashuvni Xose Munuyera Montero boshchiligidagi hakamlar brigadasi boshqarib bordi.
Madridliklar bosh murabbiyi o‘yinning 21-daqiqasida sariq kartochka oldi. U bir necha bor hakamga himoyachi Xuan Kruzning qo‘liga tegib ketgan to‘p uchun penalti belgilashi kerakligini ta’kidlagan.
Marca xabariga ko‘ra, Anchelotti Vinius Junior bilan bog‘liq vaziyatlar yuzasidan norozilik bildirgan va penalti belgilanishi kerakligini aytgan.
Murabbiyning e’tirozlaridan so‘ng Montero uning yoniga borib: "Men bilan hurmat bilan gaplashishingiz kerak" dedi va unga sariq kartochka ko‘rsatdi.
Lekin bu aniq, bu aniq penalti, - dedi Anchelotti. Keyin, Movistar translyasiyasidagi subtitrlarga ko‘ra, u zaxira o‘rindig‘ida qolgan va baland ovozda so‘kingan.
