«Dinamo» PFK Eronning «Istiqlol» klubi Joel Kojoning transferi bo‘yicha ikki bosqichli transfer transh to‘lovini nihoyat amalga oshirganini rasman ma’lum qiladi.

Asli ganalik bo‘lgan Joel Kojo «Dinamo» jamoasi safiga 2023 yil boshida kelib qo‘shildi va Vadim Abramov murabbiyligida Pro ligadagi o‘yinlari orqali ilk bor Qirg‘iziston milliy jamoasidan taklif oldi. Goleador hujumchi 2023 yilda Pro liga, 2024 yilda esa Superligada to‘purarlardan biriga aylandi. Milliy jamoasi safida yetakchiga aylanib, qator muhim gollarga mualliflik qildi. Kojoga transfer bo‘yicha bir qator takliflar kela boshlagach, «Dinamo» PFK Tehronning «Istiqlol» jamoasi taklifini qabul qildi va yanvar oyida kelishuv amalga oshdi. Ma’lum sabablar tufayli mablag‘lar klub hisob raqamiga belgilangandan kechroq tushdi. Shu tariqa, Kojo – «Dinamo» xorij klubiga rasman transfer qilgan ilk xorijlik futbolchiga aylandi.

«Kojoni jamoamizga Qirg‘iziston klubidan erkin agent sifatida taklif etgandik, Samarqanddagi ikki yillik faoliyatidan keyin Eron klubiga rasman transfer qildik. Xabaringiz bor, muhtaram Prezidentimizning «O‘zbekistonda futbolni rivojlantirishni mutlaqo yangi bosqichga olib chiqish chora-tadbirlari to‘g‘risida»gi farmoniga ko‘ra, klublarning transferlardan daromad olishi va 2030 yilga qadar xususiylashtirish qayd etilgan. Shunga muvofiq, «Dinamo» PFK ham tarkibdagi o‘yinchilarni milliy jamoalar darajasiga yetkazib, ularni xorij klublariga transfer qilish amaliyotini davom ettirishni rejalashtirgan. Shu bois bu yil boshida tarkibimizda yana bir qator iqtidorlarni saralab oldik», - deydi «Dinamo» PFK bosh direktori Dilshod Sharofutdinov.

«Dinamo» PFK Joel Kojoning keyingi faoliyatiga omad va zafarlar tilab qoladi.