“Manchester Yunayted” yarim himoyachisi Meyson Maunt Yevropa Ligasi yarim finali javob uchrashuvida “Atletik” darvozasiga dubl qayd etdi. Uning jamoasi uchrashuvda 4:1 hisobida g‘alaba qozondi (birinchi o‘yin – 3:0).
Mauntning gollari 72- va 91-daqiqalarda kiritildi. Ikkinchi gol esa o‘yinning eng yorqin epizodlaridan biriga aylandi — Rasmus Xeylund raqib darvozaboni Xulen Agirresabalagaga bosim o‘tkazib, uni xatoga majbur qildi. Meyson esa shu imkoniyatdan foydalanib, deyarli maydon markazidan to‘pni bo‘sh darvozaga yo‘lladi.
Eslatib o‘tamiz, Maunt 4 may kuni “MYU” safida 2024 yil mart oyidan beri ilk bor gol urgan edi.
