Bungacha "Manchester Yunayted"ni boshqargan niderlandiyalik mutaxassis Erik ten Xag Germaniya Bundesligasida ish boshlashga yaqin turibdi. Bu haqda insayder Fabrisio Romano o‘zining ijtimoiy tarmoqlari orqali xabar bermoqda.

Manbaga ko‘ra, niderlandiyalik mutaxassis Leverkuzenning "Bayer" klubi boshqaruvida Xabi Alonso o‘rnini egallaydi. Ispaniyalik "dorishunoslar"ni tark etib, Madridning "Real" klubiga o‘tadi. Ten Xag allaqachon "Bayer" bilan mehnat shartnomasini kelishib olgan.

Tomonlar o‘rtasidagi shartnoma 2027 yilning o‘rtalariga qadar mo‘ljallangan. Kelishuv rasman ertaga, 26 may kuni e’lon qilinishi kerak.

Germaniya chempionatining ortda qolgan mavsumida Leverkuzen jamoasi ikkinchi o‘rinni egallagan edi.