O‘zbekiston milliy terma jamoasi futbolchisi Abbosbek Fayzullayev kecha Moskva–Dubay yo‘nalishi orqali Birlashgan Arab Amirliklariga yetib bordi. “SSKA” klubi futbolchisi bo‘lajak o‘yinlar haqida O‘zbekiston futbol assosiasiyasi matbuot xizmatiga quyidagicha fikr bildirdi.

"Rossiya kubogini qo‘lga kiritganimdan juda xursandman. Bu — “SSKA” bilan birinchi sovrinim. Terma jamoaning muhim uchrashuvlari oldidan bunday yutuq yaxshi kayfiyat bag‘ishlaydi, bu esa o‘yinga ham ijobiy ta’sir qiladi.

Terma jamoa bilan ilgari ham ko‘plab yig‘inlarda qatnashganman, jamoaga moslashishim qiyin emas. Barcha futbolchilar bilan tanishman, ular meni iliq kutib olishdi.

5 iyun kuni bizni muhim o‘yin kutmoqda. Jamoamiz jangovar kayfiyatda, tayyorgarlik ham yuqori darajada. Xudo xohlasa, oldimizga qo‘yilgan vazifani bajarib, Jahon chempionati yo‘llanmasini qo‘lga kiritamiz", — deydi Fayzullayev.

Eslatib o‘tamiz, hozir O‘zbekiston terma jamoasi A guruhida 17 ochko bilan 2-o‘rinni egallab turibdi. Temur Kapadze boshchiligidagi jamoa 5 iyun kuni BAAga qarshi maydonga tushadi. Ushbu bellashuvda qo‘lga kiritilgan bir ochko O‘zbekistonga mundial yo‘llanmasini taqdim etadi.

Uchrashuv Abu-Dabidagi “An-Nahyan” stadionida bo‘lib o‘tadi. O‘yin Toshkent vaqti bilan soat 21:00 da boshlanadi.