"Napoli" "Galatasaroy"dan hujumchi Viktor Osimxen bo‘yicha yangi transfer taklifi oldi.
Avvalroq, turk klubi 26 yoshli futbolchini 60 mln yevro evaziga o‘z safiga qo‘shib olmoqchi bo‘lgan, ammo rad javobini olgandi. Endi esa, insayder Fabrisio Romanoning yozishicha, "Galatasaroy" yaxshilangan taklif bilan qaytdi - 75 mln yevro. Aynan shu miqdordagi tovon puli nigeriyalikning "Napoli" bilan shartnomasida ko‘rsatilgan, ammo tovon puli faollashtirilmaydi, chunki istanbulliklarning taklifi besh yil davomida bo‘lib-bo‘lib to‘lashni nazarda tutadi - ya’ni italyan grandi rad javobini berishga haqli.
Ma’lumotlarga qaraganda, Viktor Osimxenning o‘zi o‘tgan mavsumda ijara asosida muvaffaqiyatli to‘p tepgan "Galatasaroy"ga o‘tishni istamoqda.
