«Navbahor»ning birinchi davraga oid statistik ma’lumotlari bilan tanishtirishda davom etamiz.

Bu safar sariq va qizil kartochkalar borasidagi statistikaga to‘xtalishni lozim deb topdik.
Albatta, futbol jamoaviy sport turi sanalsada, yakkakurashlarga ham boydir. To‘p uchun kurashdagi bunday vaziyatlar esa odatda qo‘polliklarsiz o‘tmaydi.

Shuningdek, ayrim paytlarda raqib hujumini bartaraf etish, bundan tashqari, asabni jilovlay olmaslik, qiziqqonlik ham futbolchilarning hakam tomonidan ogohlantirish olishlari, ayrim paytlarda esa hattoki, maydondan chetlatishlariga sabab bo‘ladi. Qisqasi, kartochkalar millionlar o‘yinining bir bo‘lagi hisoblanadi.

Superliganing 1-davrasi bahslarida “lochinlar”ning 13 nafar futbolchisi hakamlar tomonidan sariq kartochkalar bilan “siylandi”. Mahoratli himoyachi Saidazamat Mirsaidov esa Namanganda “Andijon”ga qarshi kechgan bahsda (3-tur. 2:2) ikki marta sariq kartochka olib, maydondan chetlatildi.

Braziliyalik himoyachi Gilerme Gedesh esa 5-marta ogohlantirilib, bitta o‘yinni qo‘yib yuborishiga to‘g‘ri keldi.

“Navbahor” a’zolarining 1-davradagi kartochkalar bo‘yicha statiskasi esa quyidagicha:

Saidazamat Mirsaidov – 1 ta sariq, 1 ta qizil kartochka;
Gilerme Gedesh – 5 ta sariq kartochka;
Azimjon Ahmedov, Shohmalik Komilov – 3 tadan sariq kartochka;
Benjamin Teydi, Alisher Odilov, Umidjon Ergashev, Javohir Abdujabborov – 2 tadan sariq kartochka;
Igor Gabriyel, Sergey Karpovich, Abbosjon Gʻulomov, Zabihillo O‘rinboyev, Shahzodbek Ubaydullayev – 1 tadan sariq kartochka;