Angliyaning "Aston Villa" klubi hujumchi Olli Uotkins ketadigan bo‘lsa, unga munosib o‘rinbosar qidirmoqda. Bu haqda Goal.com xabar bermoqda.

So‘nggi ma’lumotlarga ko‘ra, Uotkins "Manchester Yunayted"ga ko‘chib o‘tishi mumkin. Agar kelishuv amalga oshsa, "Aston Villa" ispaniyalik hujumchi Samu Agexovani o‘z safiga qo‘shib olishga urinib ko‘radi. 21 yoshli futbolchi Portugaliyaning "Portu" jamoasida o‘ynaydi va 80 million yevro evaziga jamoani tark etishi mumkin.

Agexova o‘tgan mavsum barcha klub turnirlarida 45 ta o‘yinda 27 ta gol va 3 ta golli uzatma bilan ajoyib mavsum o‘tkazdi. U "Portu"ga o‘tgunga qadar "Granada", "Alaves" va Madridning "Atletiko" kabi klublarida to‘p tepgan. Bir yil oldin hujumchi Olimpiya o‘yinlari g‘olibiga aylangan, bu yil esa Ispaniya bilan Millatlar ligasi kumush medalini qo‘lga kiritgan.