Hujumchi Rasmus Xyoylund "Manchester Yunayted"ning keyingi rejalaridan o‘rin olmagan. Yaqinda mankunianliklar tarkibiga Ruben Amorim jamoasining asosiy tarkibidan joy oladigan Benyamin Sheshko kelib qo‘shildi. Jurnalist Nikolo Skiraning yozishicha, "qizil iblislar" rahbariyati Xyoylundga unga ishonmasligini ma’lum qilgan. Endi daniyalik ketishga moil.
22 yoshli futbolchi bo‘yicha muzokaralarni "Milan" olib bormoqda: Italiya klubi uni 5 mln yevroga ijaraga olishni va 40-45 mln yevroga sotib olishni taklif qilmoqda. Manbaga ishonadigan bo‘lsak, "rossonerilar" futbolchi uchun yiliga 5 mln yevro maosh bilan 2030 yilgacha mo‘ljallangan shartnoma tayyorlab qo‘ygan.
Rasmus Xyoylund "Manchester Yunayted"da ikki yil o‘tkazdi. U Angliya jamoasi safida 95 ta o‘yinda maydonga tushib, 26 ta gol va oltita samarali pas muallifi bo‘lgan.













