"Inter Mayami" tayanch yarim himoyachisi Serxio Buskets kelajagi haqida fikr bildirdi.
"Men Yevropaga qaytmayman. Hozir shunday yoshdamanki, buni qabul qilishim kerak. Hozircha shartnomani uzaytiramanmi yoki faoliyatimni yakunlaymanmi, degan qarorga kelganim yo‘q. Ammo men kelishuvni uzaytirishdan ko‘ra, ketishga yaqinroqman," - dedi Buskets BeIN Sports’ga.
37 yoshli ispaniyalik 2023 yilning yozida "Inter Mayami" futbolchisiga aylangandi. U joriy mavsum barcha musobaqalarda 31 ta o‘yinda maydonga tushdi va 6 ta golli uzatmani amalga oshirdi.
Busketsning "Inter Mayami" klubi bilan amaldagi mehnat shartnomasi joriy yilning dekabr oyi oxirigacha mo‘ljallangan.













