O‘zbekiston milliy terma jamoasi bosh murabbiyi Timur Kapadze va futbolchimiz Azizbek Turg‘unboyev O‘monga qarshi uchrashuv oldidan matbuot anjumanida ishtirok etdi.

Timur Kapadze:

— Musobaqaga tayyorgarlik yaxshi ketmoqda, barcha futbolchilar optimal holatda. Legionerlarimiz asta-sekin yig‘inga qo‘shilmoqda. Bu turnir biz uchun foydali bo‘ladi, bor e’tiborimizni musobaqaga qaratganmiz. Vatan jamoasi bitta – unga hammamiz muxlislik qilamiz. Mundialga oz vaqt qoldi, munosib tayyorgarlik ko‘rishimiz kerak.

So‘nggi yillarda futbolimiz rivoji uchun barcha sharoitlar yaratilmoqda, islohotlar davom etmoqda. Masharipov va Ashurmatov biz uchun jiddiy yo‘qotish. Ba’zi futbolchilar klublarida o‘yin o‘tkazib keyinroq yig‘inga qo‘shilyapti, taktik va jismoniy tayyorgarlik uchun vaqt kam, lekin bu tabiiy jarayon. Biroq bubholat boshqa futbolchilarga o‘zini ko‘rsatish uchun imkoniyat yaratadi.

Har bir raqib jamoaga yangi murabbiy tayinlangach, ularga qarshi o‘ynash qiyin bo‘ladi. O‘monning so‘nggi o‘yinlarini kuzatdik – hozir ular boshqa uslubda harakat qilishmoqda. Keyrush tajribali mutaxassis, yangi jamoa shakllantirmoqda. Nima yuz berishini ertangi o‘yinda ko‘ramiz.

Biz esa o‘z rejalarimiz asosida turli uslublarni sinab ko‘ramiz va zarur natijani qo‘lga kiritishga harakat qilamiz.

Azizbek Turg‘unboyev:

— Yaxshi kayfiyatda yig‘inga keldik, mashg‘ulotlar ham, tayyorgarlik jarayoni ham samarali o‘tmoqda. Oldimizda muhim o‘yinlar turibdi.

Muxlislarni stadionga taklif qilamiz. SAFA musobaqasi haqiqiy futbol bayrami bo‘ladi. Jamoamizni qo‘llab-quvvatlash uchun muxlislarimizni ertangi o‘yinda biz bilan birga bo‘lishga chaqiramiz.