La Liga prezidenti Xavyer Tebas Ispaniya chempionatida jamoa bosh murabbiyidan hakam qarorisiz videotakror ko‘rishni so‘rash imkoniyatini joriy etish istagi haqida gapirdi.

"Men umuman VAR ishi mavzusini ko‘tarmoqchiman. Menga FIFA sinovdan o‘tkazayotgan tizim yoqadi, unda har bir bosh murabbiy VARda hakamlar qarorini kutmasdan, bir o‘yinda ikki marta ko‘rishni so‘rash imkoniyatiga ega. Ishonchim komilki, bunday amaliyot ko‘plab kelishmovchiliklarning oldini olishga yordam beradi. Biz bu tizimni Ispaniya namunasida eng yuqori darajada sinab ko‘rishimiz mumkin," - deya Tebasning so‘zlarini keltiradi Sport.es.

Eslatib o‘tamiz, La Liga prezidenti VARning amaldagi ish qoidalariga bir necha bor tanqidiy munosabat bildirib, hakamlar qarori bo‘yicha bahslar musobaqaning sport jihatiga putur yetkazishini ta’kidlagan edi.