Donald Tramp JCH-2026 o‘yinlari AQSHning ayrim shaharlaridan ko‘chirilishiga yo‘l qo‘ydi.
Mamlakat prezidenti, agar turnirni qabul qilishni rejalashtirayotgan Amerika shaharlaridan birortasi xavfsiz emas deb hisoblasa, o‘yinlarni ko‘chirish imkoniyatini ko‘rib chiqishini aytdi.
Jurnalistlar o‘yinlarning Sietl va San-Fransiskoda o‘tkazilishi bo‘yicha siyosatchilarga savol berishdi. Ushbu shaharlarda turnirning oltita o‘yini bo‘lib o‘tishi kerak.
"Bu qiziq savol. Ularning xavfsizligi haqida g‘amxo‘rlik qilishimiz kerak. Sietl va San-Fransiskoni nima qilayotganini tushunmaydigan radikal so‘l telbalar boshqaradi.
Chikagoga, Memfisga, boshqa shaharlarga boramiz. U yerda xavfsiz bo‘ladi. Agar men u yerda xavfsiz emas deb qaror qilsam - biz o‘yinlarni boshqa shaharga ko‘chiramiz", - dedi Donald Tramp.
Shu bilan birga, The Athletic nashrining yozishicha, Trampda o‘yinlarni boshqa shaharga ko‘chirish vakolati yo‘q. Ammo prezident FIFA prezidenti Janni Infantino bilan bevosita aloqada.
