Rossiyalik tennischi Mariya Timofeeva endilikda xalqaro musobaqalarda O‘zbekiston sharafini himoya qiladi. Bu haqda “Forbes.ru” nashri xabar berdi.
Timofeeva Moskvada tug‘ilgan, biroq Sloveniyada shug‘ullanib keladi. U 2023-yilda Budapeshtda bo‘lib o‘tgan WTA-250 turnirida g‘alaba qozonib, o‘zining ilk sovrinini qo‘lga kiritgan. Timofeeva 2024-yilgi Australian Open musobaqasida saralashdan o‘tib, asosiy to‘rda to‘rtinchi bosqichgacha yetib borgan. Shuningdek, u Mayami va Budapesht turnirlarida ham yaxshi natijalar qayd etgan. Mariya 19 oktyabr kuni Portugaliyada bo‘lib o‘tgan ITF turnirida (W75) chempionlikni qo‘lga kiritdi.
Hozirda 21 yoshli sportchi WTA reytingida 146-o‘rinni egallab turibdi. Uning faoliyatidagi eng yuqori ko‘rsatkich 2024-yilda qayd etilgan bo‘lib, o‘shanda Mariya 93-o‘rindan joy olgan edi.
Rossiya tennis federasiyasi rahbari Shamil Tarpishchev yil boshida rossiyalik sportchilar boshqa mamlakatlar nomidan turnirlarda qatnashishi mumkinligini aytgan edi. Bu holat Rossiyada musobaqalarning yo‘qligi va moliyaviy muammolar bilan bog‘liq.
Ma’lumot uchun, 2022-yildan boshlab ITF Rossiya va Belarus tennis federasiyalarining a’zoligini to‘xtatgan va bu davlatlarda turnirlar o‘tkazishni taqiqlagan. Shunga qaramay, ATP va WTA rossiyalik tennischilarga neytral maqomda ishtirok etishga ruxsat bergan.













