Toshkentning «Paxtakor» klubi o‘z tarixida 14-marta O‘zbekiston Kubogini qo‘lga kiritdi. Finalda Kamoliddin Tojiyev shogirdlari «Buxoro»ni mag‘lub etishdi va 2026 yilgi xalqaro musobaqalarga yo‘llanma olishdi.

O‘yin tafsilotlari

Final bahsi yuqori shiddatda boshlandi. «Paxtakor» ilk daqiqalardanoq tashabbusni qo‘lga oldi — Hojimat Erkinov va Alijonov qanotlarda faol harakat qilishdi. Birinchi bo‘limda bir nechta xavfli vaziyatlar yaratildi, ammo Flamarion va Saitovning urinishlari samara bermadi. Shu bilan birga, «Buxoro» jamoasi himoyada mustahkam harakat qilib, asosiy kuchini qarshi hujumga qaratdi. Birinchi bo‘lim 0:0 hisobida yakunlandi.


Ikkinchi bo‘lim — Erkinovning rekoshet orqali urgan goli

«Paxtakor» ikkinchi bo‘limda faollikni oshirdi. Bir necha bor Flamarion va Abdumajidov orqali xavfli hujumlar uyushtirildi. 63-daqiqada esa hisob ochildi: Alijonov jarima maydoni ostonasida ochilgan Hojimat Erkinovga uzatma berdi. U esa raqibni aldab, kuchli zarba berdi. To‘p himoyachiga tegib, o‘z yo‘nalishini o‘zgartirdi va Boymurodov qo‘riqlayotgan darvozaga kirib ketdi — 1:0!

Qaynoq yakuniy daqiqalar

Goldan so‘ng «Buxoro» hujumga o‘ta boshladi. Jamoa hatto 90+3-daqiqada hisobni tenglashtirishga muvaffaq bo‘ldi. Goldan keyin VAR tekshiruvi ishga tushdi va bu jarayon 10 daqiqadan ortiqroq davom etdi. Yakuniy bosh hakam Nayim Qosimov ofsayd qayd etilganini stadionga e’lon qildi va golni bekor qildi.

Bu qaror "Buxoro" futbolchilarining keskin noroziligiga sabab bo‘ldi va futbolchilarda asabiylik yuzaga keldi.

Qo‘shib berilgan vaqt 21-daqiqa davom etdi va «Paxtakor» o‘zining 14-kubok sovrini qo‘lga kiritdi. Bu g‘alaba Kamoliddin Tojiyevni klub tarixida futbolchi va bosh murabbiy sifatida Kubok yutib olgan birinchi shaxsga aylantirdi.


O‘zbekiston Kubogi — 2025 yilgi final
«Paxtakor» — «Buxoro» 1:0 (0:0)
Gol: Erkinov (63)
Hakam: Naim Qosimov
Andijon: «Bobur arena». 6814 nafar muxlis