Saudiya Arabistonining poytaxti Ar-Riyod shahrida bo‘lib o‘tayotgan VI Islom Birdamligi o‘yinlari futzal musobaqalari bugun yakuniga yetadi. Dastlab bronza medali uchun bahs o‘tkazilsa, kun so‘ngida musobaqaning final uchrashuvi bo‘lib o‘tadi.

Bu yil birinchi marta Islom Birdamligi o‘yinlari dasturiga kiritilgan futzal musobaqalarida nafaqat musulmon mamlakatlarning, balki jahon futzalining kuchli jamoalari ishtirok etganligi turnirga bo‘lgan qiziqishni o‘n chandon oshirdi. Dunyo reytingining birinchi o‘ntaligida joylashgan terma jamoalar — Eron (6-o‘rin) va Marokash (9-o‘rin) terma jamoalarining qatnashgani buning yaqqol dalilidir. Shuningdek, musobaqaning finaliga ham aynan ushbu ikki jamoaning chiqishi bejiz emas.

O‘zbekiston milliy terma jamoasiga esa Yarim finalda omad yetishmadi. Nodir Eliboyev shogirdlari Osiyoning eng kuchli jamoasi — Eron terma jamoasiga qarshi tengma-teng kurashdi. Ammo so‘nggi daqiqalarda biroz ehtiyotsizlik oqibatida imkoniyat boy berildi.

Bugun hamyurtlarimiz bronza medali uchun maydonga chiqishadi. O‘zbekiston milliy terma jamoasi Toshkent vaqti bilan soat 18:00 da musobaqa mezbonlari — Saudiya Arabistoni futzalchilariga qarshi bahs olib boradi.

Eslatib o‘tamiz, bu jamoalar guruh bosqichining 1-turida ham o‘zaro to‘qnash kelishgan va o‘sha uchrashuvda O‘zbekiston 5:2 hisobida g‘alaba qozongan edi.

Bugungi o‘yinda ham terma jamoamizga omad va zafar yor bo‘lishini tilaymiz. G‘alaba bilan —Yurtimizga yorug‘ yuz bilan qaytishsin!

Olg‘a, O‘zbekiston! G‘alaba yor, Alloh madadkor bo‘lsin!