"Chelsi" ustozi Enso Mareska jamoadan har bir o‘yinda ajoyib o‘yin kutmaslikka chaqirmoqda.

Chorshanba kuni "ko‘klar" "Lids"ga yutqazdi (1:3). "Tovuslar" bilan o‘yin oldidan londonliklar "Barselona" (3:0) va "Arsenal" (1:1) bilan bahslardagi o‘yinlari uchun ko‘plab maqtovlarga sazovor bo‘lishdi.

"Biz har doim ham "Barselona" va "Arsenal" bilan o‘yinlardagi kabi o‘ynay olmaymiz. Bizda har ikki-uch kunda o‘ynay olmaydigan futbolchilar bor. Bular qatoriga Ris Jeyms va Uesli Fofana kiradi - bizda ularni har safar maydonga tushirish imkoniyati yo‘q", - dedi italiyalik murabbiy mag‘lubiyatdan keyin bergan intervyusida.

"Chelsi" Premyer-liga jadvalida to‘rtinchi o‘rinda bormoqda. Mareska jamoasi shanba kuni "Bornmut"ga qarshi maydonga tushadi.