Madridning «Real» jamoasi bosh murabbiyi Xabi Alonso Chempionlar ligasi umumiy bosqichi 6-turida «Manchester Siti»ga qarshi o‘yindagi (1:2) hakamlikdan qoniqmaganini aytdi.
«Ko‘ryapmizki, ayrim vaziyatlar… Birinchi golda ular biroz Kurtuani ushlab qolishdi. Ya’ni, mening fikrimcha, boshqacha talqin qilish mumkin bo‘lgan epizodlar bor. Hakam esa bunga o‘z nuqtai nazaridan baho berdi va bu hal qiluvchi bo‘ldi. Bilmadim, hali vaziyatning takrorini ko‘rishga ulgurmadim», — deb Alonsoning so‘zlarini AS keltiradi.
Ushbu o‘yindan so‘ng «Real» 12 ochko bilan Chempionlar ligasi jadvalida yettinchi o‘rinda bormoqda. Keyingi turda jamoa «Monako»ga qarshi maydonga tushadi. Uchrashuv 20 yanvar kuni Madridda bo‘lib o‘tadi.













