2026 yilning ikkinchi yarmida respublikamizda yana bir yangi stadion qad rostlaydi. Kecha — 13 dekabr sanasida Liga ishchi guruhi Guliston shahrida bo‘lib, mazkur stadion loyihasi bilan tanishib chiqdi.

12 dekabr kuni Sirdaryo viloyati hokimi Erkinjon Turdimov arenaga tashrif buyurib, unda amalga oshirilishi lozim bo‘lgan qator vazifalarni belgilab bergan bo‘lib, bunda Liga talablari inobatga olinishi lozimligi, tashkilot ishchi guruh bilan hamkorlikda faoliyat olib borish muhim ekanligini ta’kidlab o‘tgandi. 13 dekabr kungi uchrashuvdan so‘ng amalga oshirilayotgan ishlar ko‘zdan ko‘chirildi.

Liga birinchi navbatda qurilish davomida teletranslyasiyalar masalasi inobatga olinishi lozimligi bo‘yicha suhbatlashdi. Bunda kamera platformalari qay tartibda joylashtirilishi, qurilish davomida kabel tizimlari puxtka o‘tkazilishi, Gulistonga katta futbolning ehtimoliy qaytishi inobatga olinib, VAR xonasi qanday ishlashi, ko‘chma televizion stansiyalarning joylashuv nuqtalari kelishib olindi.

Shuningdek, stadionda media tribuna bunyod etish, matbuot anjumanlari, sharhlovchilar xonasi, texnik zona qanday ko‘rinishda bo‘lishi kabi masalalarda fikr almashilindi. Stadion maydonida drenaj va sug‘orish tizimi bitkazilgan, ishning shu va keyingi — maysani parvarishlashgacha bo‘lgan qismi uchun Farg‘onadagi "Istiqlol" stadioni parvarishi bilan shug‘ullanayotgan mutaxassislar jalb etilgani e’tiborga molik.

Gulistondagi stadion 16 ming muxlis uchun mo‘ljallangan bo‘lib, maydon perimetri bo‘ylab to‘rt tomonlama tribunalardan faqatgina texnik zona tomondagisi yangidan quriladi. Stadionga zamonaviy tablo o‘rnatiladi, yoritish tizimi to‘liq qayta demontaj qilinishi ko‘zda tutilgan. Loyiha 2026 yilning ikkinchi yarmida qabul qilib olinishi rejalashtirilgan. Unga qadar "Guliston" klubi raqiblarini Yangiyerda qabul qiladi.