"Sevilya" bosh murabbiyi Matias Almeyda Madridning "Real" klubiga qarshi kechgan va 0:2 hisobidagi mag‘lubiyat bilan yakunlangan o‘yindagi hakamlardan norozi bo‘ldi.
Uchrashuvning 38 va 86-daqiqalarida Jud Bellingem hamda Kilian Mbappening gollari "qaymoqranglilar"ga g‘alaba keltirdi. Birinchi bo‘lim oxirida hakam mehmonlar ustozini maydondan chetlatgan bo‘lsa, 68-daqiqada himoyachi Markos Markan ham qizil kartochka oldi.
Mbappening goli penaltidan urildi. Yana bir necha daqiqadan so‘ng hakam yana nuqtaga ishora qildi, ammo videotakrorni ko‘rgandan so‘ng qarorini o‘zgartirdi.
"Hakamlar bunday yomon ishlasa, ularni chetlatish kerak. Men hech qachon kimdir ikki daqiqa ichida ikkita penalti belgilaganini ko‘rmaganman," - dedi Almeyda matbuot anjumanida.
"Sevilya" yilni La Liga jadvalida to‘qqizinchi o‘rinda yakunlamoqda. "Real" - ikkinchi.
