“Real Madrid” Ispaniya sobiq hakamlar texnik qo‘mitasi (CTA) vise-prezidenti Xose Mariya Enrikes Negreyraga amalga oshirilgan to‘lovlar sabab “Barselona” tomonidan yetkazilgan zarar uchun ko‘p millionli kompensasiya talab qilib sudga murojaat qilish imkoniyatini ko‘rib chiqmoqda. Bu haqda AS nashri xabar berdi.

Madrid klubi fikricha, ushbu harakatlar “musobaqalarning asl mohiyatini buzgan va tushunarsiz qarorlar orqali ularni soxtalashtirishga olib kelgan”.

Ma’lumot uchun, 2023 yilda “Barselona” va uning rahbariyatiga Ispaniya Qirollik futbol federasiyasida (RFEF) faoliyat yuritgan, hakamlar texnik qo‘mitasi (CTA) sobiq vise-prezidenti Xose Negreyraga o‘tkazib berilgan mablag‘lar bo‘yicha poraxo‘rlik ayblovlari qo‘yilgan edi. Sud “Barselona” tomonidan 2001–2018 yillar oralig‘ida Negreyraga bir necha million yevro to‘langani jinoyat alomatlariga ega, deb topgan.

Avvalroq Madridning “Real” klubi “Negreyra ishi” bo‘yicha sud jarayonida xususiy ayblovchi sifatida ishtirok etayotgani haqida xabar qilingan edi. 12 dekabr, juma kuni bo‘lib o‘tgan sud majlisida “Real” yuristlari “Barselona” prezidenti Joan Laportani so‘roq qilishdi.

“Qaymoqranglilar” huquqshunoslari Laportadan hakamlar texnik qo‘mitasi sobiq vise-prezidenti Xose Negreyraga to‘lovlarning 800 foizga oshirilish sabablari, Negreyraning o‘g‘li “ko‘k-anorranglilar” uchun hakamlar hisobotlarini tayyorlashda ishtirok etgani, “Barselona” to‘lovlarni nega soliq organlaridan yashirgani va ularning asl kelib chiqishi haqida savollar berishgan.