Butunjahon boks assosiasiyasi (WBA) o‘zining yangilangan reytingini e’lon qildi. Ushbu reyting charm qo‘lqop ustalarining 2025 yil dekabr oyi yakuniga ko‘ra qayd etgan natijalari orqali tuzildi.
Quvonarlisi, ushbu jadvaldan 8 nafar o‘zbekistonlik bokschi o‘rin oldi. Aniqroq aytadigan bo‘lsak, mamlakatimiz sharafini turli musobaqalarda munosib himoya qilayotgan Shahram G‘iyosov WBA reytingining yarim o‘rta vazn toifasida birinchi o‘rinda qolgan bo‘lsa, Bektemir Meliqo‘ziyev super o‘rta vazndagi ikkinchi pog‘onasini saqlab qoldi.
Shuningdek, yarim yengil vaznda Otabek Xolmatov, birinchi yarim yengil vaznda esa Muhammad Shexov 3-o‘rinda qayd etilgan bo‘lsa, Murodjon Ahmadaliyev birinchi yarim yengil vazn toifasida 4-pog‘onadan joy oldi.
Isroil Madrimov super yarim o‘rta vaznda 6, Hasanboy Do‘smatov minimal vaznda 7-o‘ringa joylashdi. Yengil vaznda faoliyat olib boruvchi Sirojbek Ismoilov 15-o‘rinni band etdi.













