O‘zbekiston yoshlar terma jamoasi U-23 Osiyo kubogining 2-turidan o‘rin olgan uchrashuvda Eron terma jamoasiga qarshi bahs olib boradi. Avvalgi o‘yinda qo‘lga kiritilgan g‘alaba hamda bugungi uchrashuvdagi 3 ochko jamoamizga muddatidan avval keyingi bosqich masalasini hal etish imkonini beradi.

Jamoamiz musobaqaning ilk turida Livan ustidan 3:2 hisobida g‘alaba qozondi. Ushbu natijadan so‘ng vakillarimiz 3 ochko bilan guruhda peshqadamlik qilmoqda. Guruhimizdagi yana bir uchrashuvda Livan va Koreya Respublikasi terma jamoalari o‘zaro bahs olib boradi. Mazkur o‘yin Toshkent vaqti bilan soat 16:30 da start oladi.

Raqib haqida

Eron U-23 terma jamoasi bilan shu kunga qadar Osiyo kubogi doirasida ikki bor ro‘baro‘ kelingan. 2020 va 2022 yillarda bo‘lib o‘tgan uchrashuvlarning har ikkisi 1:1 hisobidagi durang bilan yakunlangan. Ushbu bahslarda Islomjon Qobilov (2020) va Otabek Jo‘raqo‘ziyev (2022) O‘zbekiston terma jamoasi safida Eron darvozasini ishg‘ol qilgan.

Eron terma jamoasi musobaqada so‘nggi bor 2022 yilda ishtirok etgan. 2024 yilgi U-23 Osiyo kubogi saralash bahslarida eronliklar O‘zbekiston bilan bir guruhdan o‘rin olgan. O‘zaro uchrashuvda jamoamiz Abbosbek Fayzullayevning yagona goli evaziga g‘alabaga erishgan. Guruhda ikkinchi o‘rinni egallagan Eron yakunda final bosqichiga yo‘llanmani qo‘lga kirita olmagan.

Musobaqa doirasidagi navbatdagi bahs arafasida O‘zbekiston yoshlar terma jamoasi bosh murabbiyi Ravshan Haydarov quyidagicha fikr bildirdi:

“Eron jamoasining Koreya Respublikasi bilan o‘yinini tahlil qilib chiqamiz. Albatta, har bir uchrashuvga strategik yondashib, ochkolar jamg‘arishda davom etishimiz kerak”.

O‘zbekiston va Eron o‘rtasidagi uchrashuv 10 yanvar kuni Saudiya Arabistonining Riyod shahrida joylashgan “Shahzoda Faysal Bin Fahd” stadionida, Toshkent vaqti bilan soat 19:00 da boshlanadi. Jamoamiz mazkur bahsda mezbon sifatida ko‘k libosda maydonga tushadi.