Ispaniya Superkubogi final uchrashuvida Kataloniyaning "Barselona" klubi Madridning "Real" klubini 3:2 hisobida mag‘lubiyatga uchratdi. "Ko‘k-anorranglilar" safida 18 yoshli vinger Lamin Yamal asosiy tarkibda maydonga tushdi va uchrashuv so‘nggida almashtirildi.
Yulduz iste’dod egasi kataloniyaliklar bilan faoliyatidagi beshinchi sovrinni qo‘lga kiritdi va bu ko‘rsatkich bo‘yicha Lionel Messini ortda qoldirmoqda. Shu yoshda afsonaviy argentinalik "Barselona" bilan atigi ikkita chempionlikni qo‘lga kiritgan.
Lamin "ko‘k-anorranglilar" akademiyasi tarbiyalanuvchisi hisoblanadi. Hujumkor yarim himoyachining bozor narxi 200 million yevroga baholanmoqda. Yamal "Barselona" bilan 2031 yil iyun oyi oxirigacha shartnoma majburiyatlari bo‘yicha bog‘langan.
