"Real"dagilar Arda Gyuler va Franko Mastantuononing o‘yinlaridan norozi.

AS nashrining ta’kidlashicha, klub har ikki futbolchining o‘yinini sinchkovlik bilan o‘rganmoqda va ular kutilganidek rivojlanmayapti, deb hisoblamoqda.

Jamoadagilar turkiyalik xavbek uchun tanlangan rol hozircha unga to‘g‘ri kelmasligini his qilishmoqda. "U hatto yangi Luka Modrich bo‘lish uchun zarur bo‘lgan o‘yinga ham yaqin emas," - deyiladi nashrda.

Yaxshi signallar ham borligiga qaramay, Gyulerning mas’uliyatli vaziyatlardagi o‘yin darajasi xavotir uyg‘otadi.

Ammo "Real"ni Mastantuononing o‘yinlari yanada ko‘proq xavotirga solmoqda. Franko asosiy tarkibda o‘ynash uchun olib kelindi, ammo murabbiylar shtabi muvaffaqiyatsiz o‘yinlar fonida unga ishonchni yo‘qotdi.

Ta’kidlanishicha, hozirda har ikki futbolchining jamoadagi o‘rni xavf ostida.