Qanot himoyachisi Aleks Ximenes «Milan»dan «Bornmut» klubiga doimiy asosda ko‘chib o‘tdi. Bu haqda taniqli insayder Djanluka Di Marsio xabar bermoqda.
Manbaning ma’lumotlariga ko‘ra, «Bornmut» APLning 25-turi doirasida «Aston Villa»ga qarshi kechgan o‘yindan (1:1) so‘ng Ximenesni sotib olish huquqini faollashtirgan. Ta’kidlanishicha, ingliz klubi Italiya tomoniga 19 million yevro naqd va 5 million yevro bonuslar tariqasida to‘laydi. «Bornmut» 20 yoshli Ximenesni o‘tgan yilning sentyabr oyida «Milan»dan ijaraga olgan edi.
Angliya chempionatining joriy mavsumida himoyachi 21 ta o‘yinda maydonga tushib, bitta gol urishga muvaffaq bo‘ldi.
«Transfermarkt» portali ma’lumotlariga ko‘ra, Ximenesning bozor qiymati 18 million yevroni tashkil etadi.
