«Barselona» bosh murabbiyi Xans-Diter Flik Madridning «Atletiko» klubiga qarshi safar o‘yini oldidan jamoadagi kadrlar muammosi haqida to‘xtalib o‘tdi.

«Bizda ba’zi muammolar bor. Reshford tayyor emas. Bu yaxshi xabar emas, lekin men o‘z jamoamga ishonaman», — dedi Flik matbuot anjumanida.

Avvalroq «Barselona» Rafinya tizzasida og‘riq his qilayotgani, shu sababli Madriddagi bahsda ishtirok eta olmasligini e’lon qilgan edi.

Sog‘lig‘idagi muammolar tufayli «Atletiko»ga qarshi o‘yinda Andreas Kristensen, Rafinya, Markus Reshford, Pedri va Gavi maydonga tusha olmaydi. Flik matbuot anjumanida ushbu futbolchilarning barchasi «Barselona» uchun muhim ekanligini alohida ta’kidlab o‘tdi.

«Atletiko» va «Barselona» 12 fevral kuni to‘qnash kelishadi. Bu Ispaniya Kubogining dastlabki yarim final uchrashuvi bo‘ladi. Javob o‘yini esa uch haftadan keyin bo‘lib o‘tadi.