«PSJ» o‘zining rasmiy saytida futbolchilarning sog‘lig‘i borasida tibbiy hisobotni e’lon qildi. Unda Chempionlar ligasi doirasidagi «Monako»ga qarshi o‘yinda jarohat olgan hujumchi Usmon Dembelening holati haqida ma’lumot berilgan.
«Boldir mushaklarida noqulaylik sezgani sababli, Dembele yaqin kunlarda mashg‘ulotlarni sport zalida davom ettiradi», — deyiladi parijliklar xabarida.
Shu tariqa, Dembele Fransiya chempionatining shanba kungi bahsini o‘tkazib yuboradi — unda «PSJ» o‘z maydonida «Mes»ni qabul qiladi.
Shuningdek, yarim himoyachi Fabian Ruis yakka tartibdagi mashg‘ulotlarga qaytganini ham ta’kidlab o‘tish lozim.
Ayni damda «PSJ» Liga 1 turnir jadvalida ikkinchi o‘rinda bormoqda va peshqadam «Lans»dan bir ochko ortda qolmoqda.
