Professional boks bo‘yicha sobiq Jahon chempionlari, filippinlik Menni Pakyao va amerikalik Floyd Meyveyzer 2026 yilning 19 sentyabr kuni o‘zaro jang o‘tkazadi. Bu haqda jang translyasiyasini amalga oshiruvchi Netflix kompaniyasi matbuot xizmati xabar berdi.

Ma’lum qilinishicha, ikki bokschi o‘rtasidagi revansh jangi ham AQSHning Las Vegas shahrida bo‘lib o‘tadi. 47 yoshli Pakyaoning hisobida 62 g‘alaba (39 tasi nokaut), 8 mag‘lubiyat va 3 durang bor. U boks tarixida sakkiz vazn toifasida Jahon chempioni bo‘lgan yagona charm qo‘lqop ustasi hisoblanadi. Pakyao uzoq yillik faoliyati davomida vazn toifasidan qat’i nazar eng yaxshi bokschi darajasiga ko‘tarilgan va doimiy ravishda tarixdagi eng yaxshi bokschilar reytinglariga kiritilgan.

Meyveyzer esa 48 yoshda, uning hisobida professional boksda 50 ta g‘alaba (27 tasi nokaut bilan) bor va umuman mag‘lubiyatga uchramagan. U beshta vazn toifasida Jahon chempioni va 1996 yilgi Olimpiada o‘yinlarining bronza medali sovrindori bo‘lgan. Meyveyzer promouterlik kompaniyasi egasi bo‘lib, uning mijozlari orasida bokschilar va aralash yakkakurash jangchilari bor. U 2017 yildan beri professional jang o‘tkazmagan edi.

Ma’lumot uchun, Pakyao va Meyveyzer 2015 yil 2 may kuni o‘zaro jang o‘tkazgan. O‘shanda hakamlar qarori bilan amerikalik bokschi g‘alaba qozongan edi. Ushbu natija tufayli u yarim o‘rta vazn toifasida Butunjahon boks kengashi (WBC), Butunjahon boks assosiasiyasi (WBA) va Butunjahon boks tashkiloti (WBO) talqinlari bo‘yicha Jahon chempionlik kamarlarini birlashtirgan edi.

Shuningdek, Floyd Meyveyzer hamda Menni Pakyao o‘rtasidagi to‘qnashuv tarixdagi eng qimmat va eng ko‘p daromad keltirgan boks jangi hisoblanadi. “Asr jangi” deya nom olgan ushbu bahs jami 600 million dollardan ortiq daromad keltirgan. Bu ko‘rsatkich o‘z ichiga rekord darajadagi – 72 million dollarlik chiptalar sotuvi va 4,6 millionta pullik translyasiya (pay-per-view) ko‘rsatkichlarini oladi. Ma’lumotlarga ko‘ra, ushbu bahsda Meyveyzer 200–250 million dollardan ortiq, Pakyao esa 100 million dollardan ortiq gonorarga ega bo‘lgan.