"Bavariya" hujumchisi Xarri Keyn Bundesliganing navbatdagi o‘yinida dubl qayd etdi — bu safar Dortmundning "Borussiya" jamoasi bundan aziyat chekdi. 32 yoshli futbolchi uchrashuvning 54 va 70-daqiqalarida raqib darvozasini ishg‘ol qildi — bu u uchun Germaniya chempionatida ketma-ket to‘rtinchi o‘yindagi dubl bo‘ldi.
Opta xabariga ko‘ra, bu Bundesliga rekordining takrorlanishidir. Bungacha ketma-ket to‘rtta o‘yinda ikki yoki undan ortiq gol urishga faqat Lotar Emmerix (1967) va Tomislav Marich (2001) muvaffaq bo‘lgan edi.
Keyn hisobida Germaniya ligasining joriy mavsumidagi 24 ta o‘yinda 30 ta gol mavjud. Ushbu seriyasi davomida u avvalroq "Xoffenxaym", "Verder" va Frankfurtning "Ayntraxt" jamoalarini ham ikkitadan gol bilan "siylagan" edi.
