«Liverpul»ning sobiq futbolchisi Jeymi Karrager Chempionlar ligasi doirasida Turkiyaning «Galatasaroy» jamoasiga qarshi kechadigan javob uchrashuvida «Liverpul» vaziyatni o‘nglay olishi haqida fikr bildirdi. Musobaqaning 1/8 finalidan o‘rin olgan dastlabki bahsda Okan Buruk shogirdlari g‘alaba qozonishgan edi (0:1).

«Men «Galatasaroy»ni kuchli jamoa deb hisoblamayman. «Liverpul» baribir ularni mag‘lub etishi va keyingi bosqichga chiqishi kerak. Buning ehtimoli 98 foizni tashkil etadi, vaholanki bir necha hafta oldin bu ko‘rsatkich 99 foiz edi. Shunga qaramay, bu murabbiy va jamoa uchun ogohlantirish signalidir. Biz ko‘rgan o‘yin o‘tgan yilning sentyabr oyida «Galatasaroy»ga qarshi kechgan bahsni (0:1) eslatib yubordi. Bu jamoani («Galatasaroy»ni) hozirda «Bavariya» haqida gapirgandek ta’riflab bo‘lmaydi», — deya Karragerning so‘zlaridan iqtibos keltiradi CBS Sports.

«Liverpul» va «Galatasaroy» o‘rtasidagi javob o‘yini 18 mart kuni bo‘lib o‘tadi.