"Tottenxem" chuqur inqiroz ko‘chasiga kirib qoldi – APLda jamoa xavfli hududga (tushib ketish zonasiga) juda yaqin turibdi (bor-yo‘g‘i 1 ochko farq), Chempionlar Ligasi 1/8 finalining dastlabki o‘yinida esa "Atletiko"dan 2:5 hisobida mag‘lubiyat qabul qilindi. "Shporlar" himoyachisi Mikki van de Ven yuzaga kelgan vaziyat haqida gapirdi.
"Men «biz birlashishimiz kerak» degan odatiy gaplarni aytishim mumkin edi. Ammo, ochig‘ini aytganda, hozir biz boshimizdan kechirayotgan voqealar – shunchaki dahshat. Ruhiy jihatdan juda tushkun holatdaman. Bundan charchadim. Endi telefondan foydalanmayapman – faqat oilam bilan ko‘rishyapman, xolos", — deya van de Venning so‘zlarini keltiradi The Touchline.
"Tottenxem" navbatdagi o‘yinini 15 mart kuni Premyer-liga doirasida safarda "Liverpul"ga qarshi o‘tkazadi.
