«Tottenxem» Premyer-liga doirasidagi «Nottingem Forest»ga qarshi o‘z maydonida kechgan bahsda sharmandali 0:3 hisobida mag‘lub bo‘ldi. O‘yindan so‘ng «shporlar» ustozi Igor Tudor oilaviy sharoiti tufayli matbuot anjumaniga chiqmadi.
Muxlislar Tudor qayd etilgan natijadan qochib, jurnalistlar oldiga chiqmadi deb gumon qilishgan edi, biroq unday emas. Xorvatiyalik mutaxassisning oilasida og‘ir judolik yuz berdi — o‘yindan so‘ng «Tottenxem» murabbiyi otasi vafot etganidan xabar topdi. Bu haqda Daily Mail nashri xabar bermoqda.
«Tottenxem» navbatdagi o‘yinini 12 aprel kuni «Sanderlend»ga qarshi o‘tkazadi. Bunday uzoq tanaffusning sababi shundaki, xalqaro o‘yinlardan so‘ng Angliyada mamlakat Kubogining 1/4 final bahslari bo‘lib o‘tadi. «Shporlar» esa ushbu turnirni allaqachon tark etishgan.
