FIFA prezidenti Janni Infantino Eron terma jamoasining AQSH, Kanada va Meksika mezbonlik qiladigan Jahon chempionatidagi ishtiroki borasida o‘z fikrlarini bildirdi.
«Biz Eron jamoasi qanday murakkab vaziyatda ekanini yaxshi tushunamiz va voqelikka teran nigoh bilan qaraymiz. Shunga qaramay, biz ishlashda davom etamiz va ularning Jahon chempionatidagi o‘yinlari iloji boricha qulay sharoitlarda o‘tishi uchun barcha imkoniyatlarni ishga solamiz. Hech qanday muqobil rejalar — na B, na C va na D rejasi mavjud emas, faqatgina A rejasi bor.
Biz murakkab geosiyosiy vaziyatda yashayapmiz va unga ta’sir o‘tkazish bizning qo‘limizda emas. Biroq biz odamlarni birlashtirishga, ularga hamjihatlikni his qilish imkonini berishga hamda tinchlik va bayram muhitini yaratishga qodirmiz», — deya ta’kidladi Infantino. Uning so‘zlaridan El Financiero iqtibos keltirmoqda.
FIFA rahbari Eron terma jamoasi Jahon chempionati yo‘llanmasini «muddatidan oldin va faqatgina sport tamoyillari asosida» qo‘lga kiritganini alohida qayd etdi. Shu bois xalqaro futbol tashkiloti ushbu natijaga hurmat bilan yondashish niyatida.
