"Galatasaroy" hujumchisi Nikolo Dzanyolo, ayni damda ijara asosida "Udineze"da to‘p surayotgan bo‘lsa-da, "Milan" klubining qiziqishlari doirasiga kirdi. Bu haqda Tuttosport nashri xabar bermoqda.

Manbaning ma’lumotlariga ko‘ra, "Udineze" mavsum yakunida futbolchining transfer huquqini to‘liq sotib olmoqchi. Biroq, "rossoneri" ham o‘yinchini o‘z safiga qo‘shib olishni rejalashtirmoqda. "Milan" bosh murabbiyi Massimiliano Allegri ushbu transferga shaxsan qiziqish bildirmoqda.

Joriy klub mavsumida Nikolo Dzanyolo 32 ta o‘yinda maydonga tushib, 6 ta gol urdi va 6 ta golli uzatmani amalga oshirdi. Transfermarkt portali ma’lumotlariga ko‘ra, futbolchining hozirgi bozor qiymati 13 million yevroni tashkil qiladi. Avvalroq hujumchi "Atalanta", "Roma" va bir qator boshqa jamoalarda ham o‘ynagan.