Italiyaning «Jenoa» klubi ukrainalik yarim himoyachi Ruslan Malinovskiy bilan hamkorlikni davom ettirish niyatida. Bu haqda Tuttosport nashri xabar bermoqda.

«Jenoa» 32 yoshli pleymeykerni yaqin mavsumlarda jamoa o‘yini shakllantiriladigan asosiy figura sifatida ko‘rmoqda. Aynan shu sababli klub rahbariyati unga yangi ikki yillik shartnoma tayyorlamoqda. Malinovskiyning italyan klubi bilan amaldagi kelishuvi 2026 yilning yoziga qadar mo‘ljallangan.

Joriy mavsumda 32 yoshli futbolchi «Jenoa» safida barcha turnirlarda 29 ta o‘yin o‘tkazib, 5 ta gol urdi, 3 ta golli uzatma berdi va 9 ta sariq kartochka oldi. Uning jamoasi 30 ta o‘yinda 33 ochko jamg‘argan holda turnir jadvalida 13-o‘rinni egallab turibdi.