Londonning «Arsenal» klubi bosh murabbiyi Mikel Arteta himoyachi Gabriel dos Santosning jarohati borasida o‘z fikrlari bilan o‘rtoqlashdi. Braziliyalik futbolchi «Sautgempton»ga qarshi kechgan kubok bahsini (1:2) oxirigacha yetkaza olmadi va 72-daqiqada zaxiraga olindi.
«Menimcha, u nimanidir his qildi. Aynan nima ekanligini hozircha aniq bilmayman. Biz uning holatini baholashimiz kerak, biroq shunisi aniqki, agar futbolchining o‘zi almashtirishlarini so‘rasa, bu hech qachon yaxshilikdan dalolat bermaydi», — deya Artetaning so‘zlarini keltiradi jurnalist Fabrisio Romano.
Joriy mavsumda 28 yoshli Gabriel dos Santos barcha musobaqalarni inobatga olganda 39 ta o‘yinda maydonga tushib, o‘z hisobiga to‘rtta gol va beshta golli uzatmani yozdirib qo‘ygan.
