Nomzodlar turniri yetakchisi Javohir Sindarov hindistonlik Rameshbabu Praggnanandhaa ustidan qozonilgan g‘alabadan keyin o‘z fikrlarini aytdi.

— “Maqsadga juda yaqinman, lekin oldinda yana ikkita muhim o‘yin bor. Ikkalasi ham qora donalarda. Shuning uchun natija haqida o‘ylamasdan, shunchaki o‘ynashga harakat qilyapman.

Turnirdagi vaziyat albatta bosim beradi. Kecha yutishim kerak bo‘lgan pozisiyani yuta olmadim. Shunda murabbiyim menga: “Agar sen bu unvonga loyiq bo‘lsang, baribir uni olasan. Agar yo‘q bo‘lsa, demak yanada ko‘proq ishlaymiz. Shuning uchun natija haqida emas, o‘yin haqida o‘yla” deb aytdi”.

Partiya haqida:

— “Rostini aytsam, bir payt tayyorgarligimni unutib qo‘ydim va kerakli yurishni emas, boshqa yurishni tez qilib yubordim. Bu xato edi. Lekin keyin o‘zimni yig‘ib oldim va vaziyatdan chiqib ketdim. Bir oz vaqt ketdi, lekin o‘yinni yana nazoratga oldim. Omad ham yordam berdi”.

U turnir oldi rejalarini ham eslab o‘tdi:

— “Turnir oldidan +1 natija ham yaxshi bo‘ladi, degan edim. Agar shunday bo‘lganida, men shunchaki xotirjam o‘ynardim. Hozir esa vaziyat butunlay boshqacha. Hozir har bir partiya juda og‘ir o‘tyapti. Bosim katta.

Kecha ham qiyin kun bo‘ldi — hatto partiyadan oldin durangga ham rozi edim. Lekin keyin yaxshi pozisiya olib ham yuta olmaganimdan xafa bo‘ldim”.

Rekord haqida:

— “Bu haqida umuman o‘ylamayapman. Turnir hali tugamagan, hozir eng muhimi keyingi partiyaga tayyorlanish.

Endi dam olish kunida tiklanib, ayniqsa qora donalarda bo‘ladigan o‘yinlarga yaxshilab tayyorlanishim kerak”.