«Bavariya» bosh murabbiyi Vensan Kompani Germaniya chempionati doirasidagi «Sankt-Pauli»ga qarshi bo‘lajak o‘yinda darvozani kim qo‘riqlashi borasidagi savolga javob berdi.

«Madriddagi o‘yindan keyin tiklanish uchun vaqtimiz kam bo‘ldi. Bu masalani bugun muhokama qilamiz va bir qarorga kelamiz. Agar Manu hech qanday muammo sezmayotganini aytsa, u maydonga tushadi. Darvozabon uchun o‘yin ritmini saqlab qolish juda muhim», — deya Kompanining so‘zlarini «Bayern & Germany» nashri keltirmoqda.

Eslatib o‘tamiz, 40 yoshli Noyer avvalroq jarohati sababli bir nechta o‘yinni o‘tkazib yuborgan edi, biroq oxirgi ikkita bahsda u asosiy tarkibda maydonga tushdi. Umumiy hisobda, Noyer joriy mavsumda barcha turnirlarda 31 ta o‘yinda ishtirok etib, 30 ta gol o‘tkazib yubordi va 10 ta uchrashuvda o‘z darvozasi daxlsizligini saqlab qoldi.