Bugun Madridning «Real» klubi Chempionlar ligasi chorak finalining javob uchrashuvida safarda «Bavariya»ga qarshi maydonga tushadi.
«Qaymoqranglilar»ga faqat g‘alaba kerak: dastlabki bahsda ular o‘z maydonlarida 1:2 hisobida imkoniyatni boy berishgan edi. Tiempo de Juego nashrining xabar berishicha, «Real»ning yarim himoya chizig‘ida ilk daqiqalardan Tyago Pitarch, Federiko Valverde, Jud Bellingem va Braim Dias harakat qilishi kutilmoqda — bosh murabbiy Alvaro Arbeloa aynan ularga asosiy urg‘uni qaratmoqchi. Eduardo Kamavinga va Arda Gyuler esa uchrashuvni zaxira o‘rindig‘ida boshlashi taxmin qilinmoqda.
Myunxendagi o‘yinning start hushtagi Toshkent vaqti bilan soat 00:00 da chalinadi. Ushbu juftlik g‘olibi yarim finalda «Liverpul»ni umumiy 4:0 hisobida mag‘lub etgan «PSJ» bilan kuch sinashadi.
