Seshanba kuni «PSJ» safarda «Liverpul»ni 2:0 hisobida mag‘lub etdi. O‘yin davomida parijliklar ustozi Luis Enrike ikkita majburiy o‘zgarishni amalga oshirdi — Nunu Mendesh va Dezire Due maydonni tark etishga majbur bo‘ldi.

Jurnalist Fabris Xokinsning xabar berishicha, chorshanba kuni Mendesh va Due tibbiy ko‘rikdan o‘tishgan. Duening tizza sohasida lat yeyish aniqlangan. Hujumchining holati xavotirga o‘rin qoldirmaydi, bu esa muxlislarni xursand qilishi tabiiy.

Nunu Mendeshga keladigan bo‘lsak, Enrike yaqin oradagi o‘yinlarda uning jismoniy yuklamalarini nazorat qilib boradi (kamroq o‘yin vaqti beradi). Portugaliyalik himoyachi sonining orqa mushagida noqulaylik sezgan.

«PSJ» o‘zining navbatdagi uchrashuvini 19 aprel kuni Fransiya chempionati doirasida o‘z maydonida «Lion»ga qarshi o‘tkazadi.