«Bavariya» bosh murabbiyi Vensan Kompani Madridning «Real» klubiga qarshi kechgan uchrashuvda sariq kartochka oldi.
Belgiyalik mutaxassis «qaymoqranglilar» gol urgan vaziyatda hujum boshlanishidan oldin Yosip Stanishichga nisbatan qo‘pollik ishlatilgan deb hisobladi va o‘z noroziligini keskin ifoda etdi. Hakam murabbiyga ogohlantirish ko‘rsatdi, natijada u «PSJ»ga qarshi bo‘lib o‘tadigan dastlabki yarim final bahsini o‘tkazib yuborishiga to‘g‘ri keladi.
«Men doimo maydon chetida xotirjamlikni saqlashga harakat qilaman, lekin futbolching yerda yotgan vaqtda [raqib gol urayotganda] norozilik bildirishni mutlaqo normal holat deb hisoblayman. Buning uchun menga kartochka ko‘rsatilganidan hayratda qoldim», – deya Kompanining so‘zlarini keltirmoqda Bayern & Germany.
«Bavariya» «Real»ni umumiy 6:4 hisobida mag‘lub etdi. «PSJ» bilan o‘yinlar 28 aprel va 6 may kunlari bo‘lib o‘tadi.
